M...يا تُونس

 يا تونس، سْمَعت الرْديِّف جِيعانَه و أمْ العْرايِسْ دِفنِتْ عْرايِسْها .. و من بعد الحِنَّه .. الدَم مْخَضِّبْ سْوَالِفْها 

 و هَامْ حَرْقُو دِڤلِةْ خْرَيِّف و حتى الكاهْنه خَيْطُو شْفايِفْها ..
 يا تونس كَفْرُو شَعبِك بِالكَعبَه و شعْبك عَابدْ للكعبه و طَايِفْها .. يا تونس البَلْدي مَازال يِتْشَيِّفْ و حَتَّى السِّبْحَه حَايِفْها .. 
يا تونس الزَوَّالِي رِزْقُو ظْرَيِّفْ و حْياتُو فِيكْ عَايِفْها ..
 يا تونس فِيقْ و إفهم الحكايه .. راكْ شِبتْ شُوف الْمرايه .. عِدِّك وليت جيفه .. قتْلو الرْبيعْ و ذْبحُو الخُطِّيفَه .. و كيما حُكْمِكْ الزَّعيمْ .. اليوم جاكْ الشِّيخْ و الخَليفَه ..
يا تونس وَلِّينَا أطْيَافْ .. أولَادْ الدْشُر و الاريافْ .. لا عندنْا كْرُوش و لا أكتَاف .. عِريانِين جيعانين مِتْهانين مِنسِيِّين .. آما نْحِبُّوك في الدَمْ ..
 إنتِي الولّادَه و الوَسَّاده و إنتي رَاسْ الهَمْ .. يا تونس ما يِتحَل الفُمْ كَانْ مِ الُجوع .. و ما يِتنَهِّد الصْدِرْ كانْ مِ الغَمْ ..
 يا تونس شِدْ خُوذْ قلبي مِنْ حُبِّكْ بْرِدْ قَطْعُو و أرْميهْ للكْلابْ ..
ما يْجينِي مِنِّكْ كَان العْذَابْ و ما يَرفَعنِي فِيكْ كان الترابْ .. 
يا تونس ، في حَيْ التضامن كُنا فْروخ صْغار .. وقتها لا نهضه ولا تْحريرْ .. تِخْلَقْنا أحْرارْْ و رَبْنا كْبِيرْ .. في الجامِعْ رْفَاقْ و في البَطْحاء رْفاقْ .. تُوِلِدنا عُشاق و تْفارِقنَا عُشاق .. مع الغروب الدِنيا تِحْمَار .. شويه مِ الياجُور و شويه م الدُمَّار .. إلِّي بايت بْلا عْشَا .. و إلِّي حايِر في حَق سكره .. وإلِّي تتعشى روز بِ النْشا .. و تْباتْ تلعن في الفقر و الحَقره .. كنا و أحنَا صْغار مُوش حابِّين نكْبرُو ..
 كنا نْسمْلو بإسم الله كي نْشُقُّو الكيَّاسْ ..
و نسَملُو بِإسمْ الله كِي نسْرْقُو الأنْزَاصْ .. و نسَملُو بِإسمْ الله باشْ تْغِيبْ آنِيسَاتِي .. و نسَملُو بِإسمْ الله كِي نْشُوطُو بِينَالْتِي .. و نْسَمْلُو بإسمْ الله كي نِزْلْقُو فِي الطَّبعَه .. و نسَملُو بِإسمْ الله كِي نَسمْعُو بِ الزِّين و السَبعه .. و نسَملُو بِإسمْ الله كِي يَطْلِعْ بُوليس في الكَارْ .. و توه يا تونس ولِّينا نُصِّينْ .. كِي نسكْرُوا يقولو علينا كُفَّارْ ..
و كِي نحِبُّو رَبِّي يقُولُو خْلاوْ البْلادْ و فْنَاوْ الأعْمارْ !!!!
يا تونس ما أوْسخنا عْملْنا العارْ .. إليِّ يُوعِد فِينا بِالَجنَّه و إلِّي كاتِب تَوَّه ع الكارْ .. و إلِّي شْرانَا بالكَستْروتات و إلِّي سْلخنا كي علالش بَطْوارْ .. و إلي سَب ليلى و مْدَح مُوزَه .. و قال آنا الشيخ المُختارْ ..
 يا تونس طُولْ عُمْرُو الجَامِعْ مْقابِل البَارْ .. الناس تْحِبْ تِخدم و تْعَرِّس و تجيبْ زْغارْ .. يا تونس يامَا صَوَّرنا نْسَا ع الكنتولْ .. و بُسْناهُم و عَنَّقناهُم و هَبطْناهُم حْيارْ .. حَبِّينا نْسا مِن كَنْتول !
 يا تُونس قولْ مكبوت قولْ مزْطُولْ .. قولْ مهبول .. حْلِمْنا نِمْلْكُو عِشْ و جَرَّايَه .. نعيشُو نِسْرْ و حَدَّايَهْ ..
نا نِكْلِتْ المْرَمَّه .. و هِي تسْهَرْ عَ السَّدَّايَه .. الصُّوفْ من وْراها سْهُولْ .. واشْ نِحْلِمْ يا تُونِس واشْ نْقُولْ .. بعْتْنا بالقْشُورْ يا تُونس مُوشْ حَتَّى بِ الفُولْ .. تصِلبنا مسامِرْ عَ الأوتَادْ .. شابْ الشْعَرْ ، تِحْنا الڤَدْ و ذَلْ الطُّولْ ...
كي أوراق الخْريفْ نتْطَلْفْحُو بْلا بطاقة تعريفْ .. بارْبُواتْ و أسْيادْ .. يا تونس ياما شدُونا في وسطْ البلادْ و قالُولْنا مْنِينْ ؟ نْقولُو مِ الرْبط و خيرِةْ العْبادْ .. عزيزي صاحِب الطابَع و نَانَا بِنْتْ بكَّارْ .. و نحنا يا تونس أولادْ زْلاصْ و أوْلادْ عيَّارْ ..
كي نُجوعو ناكلُو ساقِينا .. و كي نَشْبعُو نْبوسُو كَفْ يْدينَا .. فِينا إلِّي ولَّى أستاذْ و إلِّي تَوَّه نطَّارْ .. 
يا تونس عِشْنَا فُقرَا لِكِنْ رْجالْ .. و الرْجالْ يا تونِس كْنوزْ و أسْرَارْ .. كْلينَا البَخسْ و الماتْراكْ .. 
رِينَا النْجوم في القَايلْه و وْصِل صْياحْنا لِ الأفْلاكْ ..
رينا لونْ عينِينْ الڤمْرَه .. و لعبنا بْ شْعَرْ الشمسْ .. حبينا تونس السَمْرَه و بعنا الساشْياتْ و الحُمصْ .. و فاتْ الفوتْ .. و علاتْ الحيوطْ .. و حتى النْساء إلِّي صَوَرْناهُم عَ الكَنتُول .. إلِّي كلَاها الذِّيبْ و إلِّي خْطفْها الغُولْ ..
 يا تونس عافْنا السُّوسْ و ما عرفنا الْحنانَه و لا البُوسْ .. في البغْلِي المعلقَه تغُوصْ و في الشبْكَه البحَّارْ عْرُوسْ ...
و ما تبدِّل شَيْ ...
يا تُونس نراكْ فيكْ وينْ ما نْشِبْ .. إنتي المْرا إلِّي نحْبْ .. نْراكْ و إنْتِي ماشيه للمعمِلْ .. كي الوَرْدَه تِذْبِلْ .. مِتْشَعْبْطَه في ال 514 .. مهدودِة الحِيلْ في بومِنْديلْ .. قَطْعه قَطْعه تْلمِّي في الزْهازْ .. نْراكْ في اللُّواجْ و إنتي مْرَوحَه لِ المجَازْ .. تحلْمي باش تْعَرْسي .. بِ راجلْ بلْدي ولَّى حتَّى مِ الأحْوازْ .. ساعاتْ نراكْ مِتْحجْبه وْ مِتْعذْبَه تفَكِّرْ في المسْحانْ و الغْسيلْ و يلْزمِكْ تَخْلِطْ ع المُسَلْسِلْ .. و ساعاتْ نْشوفكْ سافْرَه و عينيكْ منْ وْراء ماكينِة الخْياطَه مْسافْرَه .. تتْخِيِل رُوحِكْ في بلاصِةْ مُهَنِّد وْ نُورْ تْمَثِّلْ
يا تونسْ حُبْنا وقتاشْ بْدا و وقتاش باشْ يُوفَا ؟


يا تُونس لِيلِتْنا كلبه و فْراقْها صْباحْ .. و أنا و إنتي يا تونس عُشاقْ ..
 لقيتِكْ في أرْخِصْ زْقاقْ شَكِّلتِك بِ العينْ و رميتِك على فرش جاحِدْ .. يا نعيشو الزوز ..
يا يموت منّا واحِدْ .. من أوِّل بوسه الرِّيق في الفُمْ شاحْ .. و منْ أوِّلْ كلمه القلب بِأسْرارو باحْ .. 
يا تونس حُط ياسْمينك على كفِّي خَلِّيهْ ينَوَّرْ عَ الجْراحْ .. 
علاش يا تونس بْديتْ تْهيِّجْ في اللَّحيه .. و تْسنس في يْديك بِ السْلاح ؟ 
الليله يا نكون ربيعك .. يا نعصف ع مراكبك رياحْ .. يا نكونو واحدْ يا نموتو الزُوزْ رُدْ بالِكْ لا ياخْذِكْ راشِدْ .. و نموتْ في حْبوساتِكْ مَغْزُوزْ 


Poème de Mehdi Hmili ,jeune poète et cinéaste Tunisien